അത്തം

അർത്ഥമേറെപ്പൊലിപ്പിച്ചൊരോർമ്മതൻ
ആർത്തിരമ്പൽ തുടങ്ങുന്നതിങ്ങനെ!

ചിത്തിര

ഇന്നലത്തേക്കാളുമോർമ്മതൻ കോലായിൽ
ചിത്തിരക്കളം തീർക്കുന്നതിങ്ങനെ!

ചോതി

എത്രയിമ്മട്ടിലോർമ്മകൾ കാണുമെ –
ന്നോർത്തിരിക്കുന്ന പൂച്ചോതിയിങ്ങനെ!

വിശാഖം

ഓർത്തിരിക്കാതെയോരോന്നുമോരോന്നു-
മറ്റുപോകുന്ന കോലങ്ങളിങ്ങനെ!

അനിഴം

അത്രമേൽ ചേർത്തു പ്രേമിച്ചൊരോർമ്മയെ
ആർത്തിയോടേയൊരുക്കുന്നതിങ്ങനെ!

തൃക്കേട്ട

പൂമണം ചന്തമൊട്ടിനിൽക്കും പോലെ
പൂക്കളം തൊട്ട മുറ്റങ്ങളിങ്ങനെ!

മൂലം

ഓണമൊന്നിന്റെയോർമ്മമൂലം കാണ-
മുണ്ടു പോന്നോരു കാലങ്ങളങ്ങനെ!

പൂരാടം

കാലമെത്ര കടന്നാലുമത്രമേൽ
കാത്തുവെച്ചോരു പൂക്കാലമിങ്ങനെ!

ഉത്രാടം

ചോർന്നു വാർന്നു പോം കാറ്റിന്റെയോർമ്മ പോൽ
ഓണരാവിന്റെയുത്രാടമിങ്ങനെ!

തിരുവോണം

അല്പ മാത്രകൾ മാത്രം…
‘പിന്നെ നീയെന്നെ വിട്ടു പോ’മെന്ന തിരുവോണമിങ്ങനെ!